Bestheim Pinot Gris (2021)

Ilmríkt Pinot Gris frá Alsace

Bestheim Pinot Gris er gullið hvítvín í dæmigerðum Alsace-stíl. Ilmurinn er ríkulegur og opnast með þroskuðum perum, ferskju, hunangi og þurrkuðum apríkósum, ásamt léttum reykjar- og kryddtónum sem einkenna þrúguna. Í munni er vínið kringlótt og nánast silkimjúkt, með meiri fyllingu en flest hvítvín, örlitlum ávaxtasætuvotti og nægri sýru til að halda góðu jafnvægi. Pinot Gris nýtur sín einstaklega vel í svölu og þurru loftslagi Alsace, þar sem langt og milt haust gefur þrúgunni tíma til að byggja upp ilm og þéttleika. Þetta er höfðinglegt og matvænt hvítvín sem ræður við bragðmeiri rétti en fólk treystir hvítvíni alla jafna fyrir.

Framleiðandinn

Bestheim er einn af stærri framleiðendum Alsace-héraðs og á rætur í samvinnufélögum vínbænda í þorpunum Bennwihr og Westhalten. Á bak við húsið standa fjölmargar vínbændafjölskyldur sem rækta þrúgur víðs vegar um héraðið, meðal annars í brekkunum undir Vogesafjöllum. Bestheim er hvað þekktast fyrir ilmrík hvítvín úr klassísku Alsace-þrúgunum Riesling, Gewurztraminer og Pinot Gris, og hefur byggt upp orðspor fyrir áreiðanleg gæði og hreinan svæðisstíl.

Vínpörun

• Alifugl
• Svínakjöt
• Fiskur
• Asískir réttir
• Ostar